दस्तावेज–२०६८ मंसिर
2011-11-23 07:46:09 | ध्रुव दंगाल
समृद्ध सिन्धुपाल्चोकको लागि आठ बुँदे प्रतिबद्धतापत्र जारी गर्दै बुधबार सिन्धुपाल्चोक महोत्सव सकिएको छ। आपसबीचको सहअस्तित्व स्वीकार गरी जिल्लाको विकासका लागि सहमती, सहकार्य र एकता कायम राख्ने सामूहिक उद्घोष गर्दै यहाँ क्रियाशिल आठ राजनीतिक दलको तर्फबाट प्रतिबद्धतापत्र जारी भएको हो।
सबै पक्षलाई क्रियाशिल बनाइ विकासको मार्गमा अघि बढ्न 'सिन्धु-विकास अभियान' नामक साझा मञ्च गठन गरिएको छ। हाललाई यसको संयोजन गर्ने जिम्मेवारी नेपाल सरकारका पूर्वसचिव पुण्यप्रसाद न्यौपानेलाई दिइएको छ। भौतिक तथा मानव विकास रणनीतिको निर्माणमा सघाउन विकासका साझा अवधारणा कार्यान्वयन गर्ने र सो क्रममा देखापरेका चुनौती संयुक्तरुपमा समाधान गर्ने, दलीय सहअस्तित्वलाई स्वीकार्दै स्वस्थ्य प्रतिस्पर्धाको बातावरण बनाउने, जिल्लावासीको सर्वोत्तम हित निम्ति दलबीचको मतभेदलाई साँघुरो बनाउँदै विकासका मुद्दाहरु सम्बोधन गर्ने प्रतिबद्धता जाहेर गरिएको छ।
